बेस्टमध्ये ज्येष्ठांना 50% सवलत: फेस्कॉमच्या मागणीला यश, पालिकेकडून 1 कोटींची तरतूद

मुंबई, 20 मे 2026  

बेस्ट बसमधून प्रवास करणाऱ्या ज्येष्ठ नागरिकांना 50% तिकीट सवलत मिळावी ही महाराष्ट्र ज्येष्ठ नागरिक महासंघाची (फेस्कॉम) अनेक वर्षांची मागणी होती, अशी माहिती अध्यक्ष सुरेश पोटे यांनी दिली. या मागणीची दखल घेत बृहन्मुंबई महानगरपालिकेने 2026-27 च्या अर्थसंकल्पात 1 कोटी रुपयांची विशेष तरतूद करून सवलतीचा प्रस्ताव ठेवला आहे.

 फेस्कॉम, मुंबई-नवी मुंबई विभागाने 15 नोव्हेंबर 2025 व 16 एप्रिल 2026 रोजी पालिका आयुक्तांना पत्र देऊन वाढती महागाई व मर्यादित उत्पन्न लक्षात घेता विनामूल्य किंवा 50% सवलतीची मागणी केली होती.  

-  नियोजन विभागाचे संचालक यांनी 20 मे 2026 रोजी फेस्कॉमला पत्र क्र. संचालक/नियो./354 द्वारे कळवले की, सवलतीमुळे बेस्टच्या महसुली नुकसानीची भरपाई करण्यासाठी 1 कोटींची तरतूद केली आहे.   

- 1 एप्रिल 2026 पासून ही सवलत लागू करण्याचा प्रस्ताव आहे. बेस्टला होणारा प्रत्यक्ष खर्च पालिका अदा करेल.  

ही सवलत अद्याप लागू झालेली नाही. हा केवळ प्रस्ताव असून त्यासाठी निधी बाजूला काढण्यात आला आहे. बेस्ट प्रशासन, स्थायी समिती व महासभेच्या मंजुरीनंतरच योजना प्रत्यक्षात येईल.  

फेस्कॉम मुंबई 

अध्यक्ष सुरेश पोटे म्हणाले, "निधीची तरतूद हे पहिले पाऊल आहे, याचे स्वागत. हा 2 वर्षांच्या पाठपुराव्याचा परिणाम आहे. मात्र, हा प्रस्ताव कागदावरच राहू नये. 1 एप्रिल 2026 पासून विलंब न करता व किचकट अटींशिवाय थेट 50% सवलत मिळावी, यासाठी आम्ही आयुक्तांना भेटणार आहोत."    

प्रस्तावाला मंजुरी मिळाल्यास मुंबईतील 60 वर्षांवरील अंदाजे 15 लाखांहून अधिक ज्येष्ठ नागरिकांना लाभ होईल. सध्या बेस्टमध्ये महिलांना 50% सवलत आहे. त्याच धर्तीवर ही योजना राबवली जाणार आहे.