प्रारूप अधिसूचनेवर हरकती व सूचना मागवण्याचा कालावधी 1फेब्रुवारी ते 14 फेब्रुवारी पर्यंत

 प्रारूप अधिसूचनेवर  हरकती व सूचना मागवण्याचा कालावधी

1फेब्रुवारी ते 14 फेब्रुवारी पर्यंत 

                                                                            पालिका आयुक्त डॉ.विजय सूर्यवंशी 

डोंबिवली ( शंकर जाधव ) कल्याण डोंबिवली महानगरपालिका सार्वत्रिक निवडणूक 2022  करिता निवडणूक प्रभागांच्या सीमांची प्रसिद्धी, हरकती व सूचना मागविणे, सुनावणी देणे इ.चा कार्यक्रम महाराष्ट्र राज्य निवडणूक आयोगाने जाहीर केला असून त्या अनुषंगाने सविस्तर माहिती  पत्रकार परिषदेत महापालिका आयुक्त डॉ. विजय सूर्यवंशी यांनी जाहीर केली.यामध्ये  1 फेब्रुवारी 2022 रोजी निवडणूक प्रभागांच्या सीमा दर्शवणारी प्रारूप अधिसूचना शासन राजपत्रात प्रसिद्ध करण्यात आली असून त्यास प्रसिद्धी देण्यात येणार आहे. प्रारूप अधिसूचनेवर  हरकती व सूचना मागवण्याचा कालावधी 1फेब्रुवारी ते 14 फेब्रुवारी पर्यंत असून ,प्राप्त झालेल्या हरकती व सूचनांचे विवरण पत्र दिनांक 16 फेब्रुवारी  रोजी राज्य निवडणूक आयोगास सादर केले जाणार आहे. राज्य निवडणूक आयोगाने प्राधिकृत केलेल्या अधिकाऱ्यांमार्फत हरकती व सूचनांवर  सुनावणी देण्याचा अंतिम  26 फेब्रुवारी पर्यंत आहे. सुनावणीनंतर प्राधिकृत अधिकाऱ्यांनी केलेल्या शिफारशी विहित नमुन्यात नमूद करून विवरण पत्र राज्य निवडणूक आयोगास  2 मार्च 2022 रोजी पाठविले जाईल.ही निवडणूक पॅनल पद्धतीने होणार असून 44 प्रभाग असणार आहेत त्यापैकी 43 प्रभाग त्रिसदस्यीय  व एक प्रभाग चार सदस्यांचा असेल. त्यामुळे एकूण 133 सदस्य या सार्वत्रिक निवडणुकीत निवडून येणार आहेत त्यापैकी 67 जागा महिलांसाठी आहेत. एकूण सदस्य  संख्येपैकी अनुसूचित जातींसाठी 13 जागा राखीव असून त्यापैकी अनुसूचित जातींच्या महिलासाठी 07 राखीव आहेत. अनुसूचित जमाती साठी 4 जागा असून त्यापैकी 02 जागा अनुसूचित जमातीच्या महिलांसाठी  राखीव आहेत. सर्वसाधारण (खुल्या) जागा 116 असून त्यापैकी 58 जागा महिलांसाठी राहणार आहेत. महापालिका सार्वत्रिक निवडणूक 2022 करिता प्रारुप प्रभाग रचना ही www.kadmcelection.com या वेबसाइट वर उपलब्ध आहे, अशी माहिती पालिका आयुक्त डॉ. विजय सूर्यवंशी यांनी दिली.