कल्याण-भावनगर एक्स्प्रेसमध्ये महिला प्रवाशाला लुटण्याचा प्रयत्न
करणाऱ्या पाच दरोडेखोर गजाआड
डोंबिवली ( शंकर जाधव )
कल्याण-भावनगर एक्स्प्रेसमध्ये चाकूचा धाक दाखवून महिला प्रवाशाला लुटण्याचा प्रयत्न करणाऱ्या पाच दरोडेखोरांना पोलिसांनी अटक केली आहे. अटक करण्यात आलेल्या आरोपींमध्ये एक अल्पवयीन असून त्याचे वय १४ वर्षे असल्याचे सांगण्यात येत आहे. कल्याण जीआरपीचे स्टेशन प्रभारी वाल्मिक शार्दुल यांनी सांगितले की, ही घटना 27 जानेवारीच्या रात्री घडली. कर्जत ते बदलापूर दरम्यान सोलापूरहून वसईकडे जाणाऱ्या महिला प्रवाशाला पाच दरोडेखोरांनी लुटण्याचा प्रयत्न केला. महिला प्रवाशाने पर्स न दिल्याने दरोडेखोरांनी तिला चाकूचा धाक दाखवला. कल्याण जीआरपीच्या महिला पोलिस निरीक्षक अर्चना दुसाने यांनी घटनेला दुजोरा देताना सांगितले की, दरोडेखोर लुटण्याचा प्रयत्न करत होते. त्याचवेळी एका प्रवाशाने नियंत्रण कक्षाला फोन करून माहिती दिली, भावनगर एक्स्प्रेस कल्याणमध्ये येताच जीआरपीच्या पथकाने पाच दरोडेखोरांना पकडले. अटक करण्यात आलेले दरोडेखोर पुण्याचे रहिवासी असून तबरेज मुनीर शेख, दानिश अनीस खान, अजय अशोक दबडे आणि निजाम दाऊद शेख अशी त्यांची नावे आहेत. पाचवा आरोपी अल्पवयीन असून तो अवघ्या 14 वर्षांचा आहे. सध्या लोहमार्ग पोलीस सर्व आरोपींची ५ दिवसांची कोठडी घेऊन चौकशी करत असून आरोपींनी आणखी किती घटना घडल्या आहेत याचा शोध घेतला जात आहे.
0 टिप्पण्या