सामाजिक संस्थांमध्ये युवकांनी सहभागी व्हावे ! दत्ताराम दळवी, संपादक सा. प्रकट महाराष्ट्र.

-------------------------------------------------------------------

मुंबई - समाजात जन्माला आलेली प्रत्येक व्यक्ती ही समाजाचे देणे लागते आणि ते देणे कोणत्याही प्रकारे आपल्याला फेडावेच लागते. म्हणून प्रत्येकाने समाजसेवेचे व्रत अंगीकारणे महत्वाचे आहे. त्यासाठी प्रत्येक तरुणाने आपले वाडवडील जी संस्था आजपर्यत चालवित आलेले आहेत ती आधुनिकतेने पुढे घेऊन चालवणे अंगीकारले पाहिजे. कारण आताची तरुण पिढी ही इंटरनेट व संगणकिय विद्येने पारंगत आहेत. त्याचा उपयोग तरुणांनी सामाजिक संस्था चालविण्यासाठी करावा असे मार्गदर्शन सा. प्रकट महाराष्ट्रचे संपादक दत्ताराम दळवी यांनी आदर्श शिक्षण समितीने आर्य समाज लोअर परेल येथे आयोजित केलेल्या ६४ व्या वर्धापनदिन व विद्यार्थी गुणगौरव समारंभात केले. आदर्श शिक्षण समितीचे तहहयात विश्वस्त श्री. शांताराम गोवळकर यांनी समितीला नेहमीच प्रसिध्दीच्या झोतात ठेऊन आर्थीक बाजु भक्कम करुन ठेवलेली आहे. म्हणून समिती आज असे खर्चीक कार्यक्रम घेऊ शकते. असेही दळवी पुढे म्हणाले.

     आदर्श शिक्षण समिती दरवर्षी इयत्ता पहिली ते पदवी पर्यंतच्या विद्यार्थ्यांच्या गुणवंत्ते नुसार निवड करुन त्यांना शैक्षणिक मदत करुन व शिष्यवृत्ती देऊन प्राविण्य मिळविलेल्या विद्यार्थ्यांचा सन्मान व त्यांचा यथोचित गौरव करते. याही वर्षी गुणवत्ते नुसार निवड करुन विद्यार्थ्यांना स्मृतिचिन्ह, भेटवस्तु व रोख शिष्यवृत्ती मान्यवरांच्या हस्ते देण्यात आली. शांताराम गोवळकर, शंकर पाटणकर व गजानन पाटणकर यांच्यासारखे काम करणे आम्हाला जमणार नाही. परंतु त्यांचा आदर्श समोर ठेवून आम्ही त्यांच्या सारखे काम करण्याचा प्रयत्न नक्कीच करु असे मत आपल्या प्रास्ताविकेत आदर्श शिक्षण समितीचे अध्यक्ष सुरेश पवार यांनी केले. आणि सर्व उपस्थित सभासदांना सहकार्य करण्याचे आवाहन केले. विद्यार्थ्यांनी योग्य अभ्यासक्रमाची निवड करुन त्याप्रमाणे अभ्यास करुन स्वत:ची आणि समाजाची प्रगती करावी. असे भरत पाटणकर व राजाराम पवार यांनी उपस्थित विद्यार्थ्यांना मार्गदर्शन केले.

  कार्यक्रमाच्या सुरुवातीला अनंत दाभोळकर यांनी गेल्या ६४ वर्षांच्या कार्याचा आढावा घेतला. कार्यक्रम यशस्वी करण्यासाठी आदर्श शिक्षण समितीच्या सर्वच कार्यकर्त्यांनी फार मोठी मेहनत घेऊन कार्यक्रम यशस्वी करण्यास मदत केली. तर सरचिटणीस भरत पाटणकर यांनी पाहूण्यांचे, गौरव केलेल्या विद्यार्थ्यांचे आणि उपस्थित सर्व सभासद बंधु भगिनिंचे आभार मानले.